"Qarant" Kredit təşkilatından Şikayət-2.2 min kredit götürüb, 45 min ödəyib, yenə borcludur

Lombardlar vətəndaşlar müəyyən girov qarşılığında kreditlər verən kommersiya təşkilatlarıdır. Bu təşkilatların faiz dərəcəsinin banklara nisbətən çox olmasına baxmayaraq, əhali arasında kredit əldə etmək üçün lombardlara üz tutanların sayı kifayət qədərdir.Eyni zamanda Lombardlardan kifayət qədər şikayətlər daxil olur.

 

2016-cı il tarixində qızıl girovu müqabilində Bakı şəhərində fəaliyyət göstərən lombardların birindən 2.200 manat pul götürən Camal Qaraxan oğlu Sadıqov 8 ildə ümumilikdə 45 min manat ödədiyini, ancaq hələ də borclu qaldığını bildirir.

 

Bu barədə BakuPress.Az -a Camal Sadıqov rəsmi şəkildə müraciət edib.

 

O bildirir ki, müxtəlif səbəblərdən götürdüyü pulu vaxtında ödəyə bilməyib, ona görə də lombardları dəyişdirib:

 

“Sonuncu dəfə 3 il əvvəl krediti "Qarant" kredit təşkilatına yönəltmiş, bu təşkilata ümumilikdə 8.741 manat ödəyərək 06.04.2024-cü il tarixdə krediti tam olaraq bağlamışam. Lakin 2 ay vaxt keçməsinə baxmayaraq, çoxlu sayda müraciətlər etsəm də, əsassız bəhanələr gətirməklə girov qoyduğum qızılı qaytarmaqdan imtina edirlər”.

 

Onun iddiasına görə, krediti tam olaraq ödəyib, ancaq “Qarant”dan əvvəlcə 2700 manat, sonradan isə 1051 manat faiz borcunun qaldığı bildirilib. Həmçinin o, müqavilənin 3 dəfə dəyişdirilərək, ümumilikdə 2.000 manat pulunun mənimsənilməsindən də narazılıq edir.

 

İddiaçı “Qarant”ın Tural və Aqil adlı əməkdaşlarının ona qarşı haqsızlıq etdiyini də vurğulayıb.

 

Məsələ ilə bağlı “Qarant”ın Aqil adlı əməkdaşı ilə əlaqə saxladıq. BakuPress.Az-a açıqlamasında şikayətçinin iddialarının doğru olmadığını iddia edib:

 

“Həmin müştəri ödənişi kifayət qədər gecikdirib, buna görə də gecikmə borcları yaranıb. Borcu haqqında bütün rəsmi məlumatlar özünə təqdim olunub. Sonuncu dəfə istədiyi rəsmi məktub da poçt vasitəsi ilə ona göndərmişik. Müştəri bizimlə heç cürə razılaşmır.Əgər bizimlə bağlı dələduzluq faktı varsa, məhkəməyə müraciət etsin”.

Biz öz növbəmizdə Aqil müəllimə sual etdik:"Əgər həqiqətən siz,dediyiniz kimi haqlı tərəfsinizsə nədən Camaı Sadıqovu bu günə kimi siz məhkəməyə verməmisiniz?"

Təbii ki,sualımız cavabsız qaldı.

Onu da qeyd edək ki,vətəndaş Camal Sadıqov bütün ödəniş cədvəlləri və çekləri redaksiyamıza təqdim edib.Lazım gələrsə, həmin sənədləri hüquq mühafizə orqanlarına təqdim etməyə hazırıq.

Araşdırmamız davam edir.

0.035037994384766