Səhhətində yaranan problemlərlə əlaqədar sentyabrın 24-də Mərkəzi Klinik Xəstəxanaya yerləşdirilən deputat Qənirə Paşayevanın son durumu məlum olub.

Bu barədə mətbuata deputatın qardaşı Hüseyn Paşayev məlumat verib.

O bildirib ki, Qənirə Paşayeva hazırda reanimasiyadadır:

“Qənirə Paşayevanın vəziyyəti stabil ağırdır. Deputatın müalicəsi davam etdirilir”.

Qeyd edək ki, sentyabrın 24-ü gecə saat 3 radələrində TƏBİB-in tabeliyindəki Abşeron Rayon Mərkəzi Xəstəxanasının Təcili və Təxirəsalınmaz Tibbi Yardım Stansiyasına Q.Paşayeva üçün çağırış daxil olub. Ona naməlum mənşəli hipotonik vəziyyət diaqnozu qoyulub. Müayinə zamanı göstəriciləri - arterial təzyiq 50/0 mm civə sütunu, nəbz 1 dəqiqədə 47 vurğu, SPO2 (saturasiya) 82% olub. İlkin müdaxilələrdən sonra göstəriciləri arterial təzyiq 110/60 mm civə sütunu, nəbz 1 dəqiqədə 68 vurğu, SPO2 (saturasiya) 97% olub.

Həkimlər Q.Paşayevanın xəstəxana şəraitində müalicəsini məsləhət görüblər. Deputat ailə üzvlərinin istəyi ilə təcili tibbi yardım briqadası tərəfindən Mərkəzi Klinikaya təxliyə olunub. O, süni tənəffüs aparatına qoşulub.