Abşeronda 200-dən çox ailə dələduzluq faktı ilə üzləşib.

Bakupress.az-ın məlumatına görə, Qobu qəsəbəsinin yeni yaşayış massivində evlərə su xəttinin çəkilməsi üçün hər ailədən 650 manat məbləğində pul yığılıb, lakin sonradan həmin vəsait mənimsənilib. 

Məlum olub ki, həmin ərazidə yaşayan üç nəfər - Akif, Vaqif və Araz adlı şəxslər birləşərək “Azərsu” ASC-nin adından ümumilikdə 84 min manat pul toplayıblar.

Sakinlərin sözlərinə görə, Akif, Vaqif və Araz  topladıqları vəsaiti podratçı təşkilata verdiklərini desələr də, bu vaxta qədər onların evlərinə su xətti çəkilməyib.

Adı dələduzluq faktında hallanan Vaqif Eynalov və Akif Əliyev açıqlamasında bildiriblər ki, onlar da digər sakinlər kimi hadisənin qurbanıdırlar. Onlar da vəsaiti Araz adlı şəxs vasitəsilə podratçı təşkilata veriblər. Əslində isə heç podratçı təşkilat belə yox imiş.

Sakinlər bildiriblər ki, mövcud məsələ ilə bağlı hüquq-mühafizə orqanlarına müraciət ediblər.

Hazırda iş üzrə araşdırmalar aparılır.